Kobud və qalınlaşmış dabanlar bir çox insanın qarşılaşdığı problemdir. Tez nəticə əldə etmək istəyərkən bəzən sərt pilkalardan istifadə edilir və ölü dəri intensiv şəkildə təmizlənir.

Presedenttv.com xəbər verir ki, bu barədə Demokrat.az yazıb.

Lakin belə yanaşma əks effekt verə bilər. Həddindən artıq sürtünmə dərinin qıcıqlanmasına və daha da qurumasına səbəb ola bilər. Sadə ev üsulu ilə dabanları necə yumşaltmağın və ayaq dərisinə hamar görünüş qaytarmağın yolu təqdim edilib.

Ev şəraitində dabanları necə yumşaltmaq olar?

Dabanlar quruyub çatlayırsa, xüsusilə ehtiyatlı və müntəzəm qulluq etmək vacibdir. Bütün qalınlaşmış dərini bir dəfəyə təmizləməyə çalışmaq məsləhət görülmür.

Nəşrin yazdığına görə, rozmarinin bir neçə budağı adi ayaq vannasını ev şəraitində SPA proseduruna çevirə bilər.

Quru dabanları yumşaltmaq üçün rozmarinli ayaq vannası hazırlamaq olar:

* iki budaq təzə rozmarini xırdalayın;
* qaba 2–3 litr ilıq su tökün;
* rozmarini suya əlavə edin;
* ayaqlarınızı təxminən 10 dəqiqə vannada saxlayın;
* prosedurdan sonra ayaqlarınızı dəsmalla ehtiyatla qurulayın.

Vannanın müddətini həddindən artıq uzatmamaq vacibdir. Uzun müddət suda saxlamaq problemi həll etməklə yanaşı, dərinin yenidən kobudlaşmasına da səbəb ola bilər.

Ayaq vannasından sonra dabanları ehtiyatla qurulamaq, daha sonra isə çatlar və ağrılı nahiyələr yoxdursa, yumşaq pilkadan istifadə etmək olar. Məqsəd bir dəfəyə bütün sərtləşmiş dərini təmizləmək deyil, ağrı və dəridə mikro zədələnmə riski yaratmadan onu tədricən hamarlaşdırmaqdır. Uzunmüddətli nəticəni prosedurun intensivliyi deyil, müntəzəmliyi təmin edir.

Dabanlara qulluq vannadan sonra başlayır

Ayaq vannasından sonra qulluq davam etdirilməlidir. Hələ nəm olan dəriyə zəngin tərkibli krem çəkmək məsləhətdir. Quruluq güclüdürsə, tərkibində sidik cövhəri (urea) olan kremə üstünlük vermək olar.

Xüsusi qulluq vasitəsi yoxdursa, gecə yatmazdan əvvəl nazik qat vazelin çəkib pambıq corab geyinmək də mümkündür.

Məhz bu mərhələ əldə edilən nəticənin nə qədər davam edəcəyinə təsir edir. Kifayət qədər nəmləndirmə olmadıqda, ən diqqətli ayaq vannası belə gözlənilən nəticəni verməyə bilər.