Azərbaycanda satılan quru meyvələrə qatılan zəhərlər: PARLAQLIQ sizi aldatmasın
Kimyəvi emal təkcə kükürdlə məhdudlaşmır. Quru meyvələrə qeyri-təbii parlaq rəng vermək üçün bəzən sintetik qida boyaları da əlavə olunur. Məsələn, ərik qurusu normada açıq narıncı və ya tünd qəhvəyi çalarda olmalıdır. Əgər ərik qurusu çox açıq sarı, hətta qırmızımtıl rəngdədirsə, deməli o, təbii yolla deyil, kimyəvi boyalarla emal edilib. Bu cür parlaq və cəlbedici rəng, məhsulun orqanizmə faydasını şübhə altına alır, çünki boyaların bir qismi toksik ola bilər. Eynilə, açıq qızılı rəngdə kişmiş (ağ üzüm qurusu) görürüksə, bilin ki, o, kükürd dioksid və ya digər kimyəvi üsulla süni ağardılaraq əldə edilib.
Digər bir hiylə isə quru meyvələrin üzərinə parafin, keyfiyyətsiz yağ və ya qliserin çəkməkdir. Bu maddələr meyvələrin səthinə parlaq görünüş və yapışıqsız, yumşaq tekstura verir. Məsələn, qara gavalı (quru gavalı) bəzən bitki yağı ilə yağlanır və ya qliserinlə işlənir ki, parıltılı görünsün.