Presedenttv.com xəbər verir ki, bununla bağlı Gürcüstan XİN məlumat yayıb.
Bildirilib ki, görüşdə səfirə izah edilib ki, Diplomatik Münasibətlər haqqında 1961-ci il Vyana Konvensiyasının 41-ci maddəsinin 1-ci bəndinə uyğun olaraq, diplomatik nümayəndəliyin üzvü fəaliyyət göstərdiyi dövlətin qanunlarına və qaydalarına hörmət etməyə borcludur və həmin ölkənin daxili işlərinə qarışmamaq öhdəliyi var.
Qeyd olunub ki, Gürcüstan tərəfi ölkədə radikallığın təşviq olunması cəhdlərindən narahatdır. Həmçinin bu hal demokratiya prinsiplərinə ziddir və cəmiyyətin qütbləşməsinə xidmət edir. Ölkədə gedən məhkəmə proseslərini siyasiləşdirmək cəhdləri və səfirlərin bu prosesdə iştirakı da narahatlıq doğurur.
Gürcüstan tərəfi Almaniya səfirinin nifrətin qızışdırılması və dezinformasiyanın yayılmasının təşviqi ilə bağlı nitqinin əsasları ilə maraqlanıb. Vurğulanıb ki, səfirlikdən bu narahatlıqların konkret əsaslandırılması rəsmi şəkildə xahiş olunub və Gürcüstan tərəfi bu cür ittihamları hökumətə qarşı növbəti əsassız hücum cəhdi hesab edir.
Həmçinin bildirilib ki, Gürcüstan hökuməti ona qarşı aparılan məqsədyönlü kampaniyalara baxmayaraq, ikitərəfli münasibətlərə böyük əhəmiyyət verir. Hesab edir ki, bu cür hərəkətlər iki ölkə arasında illər ərzində qurulmuş tərəfdaşlıq münasibətlərinə xələl gətirir. XİN diplomatik nümayəndələrin fəaliyyətinin gələcəkdə ölkələr arasında qarşılıqlı hörmətə əsaslanan əməkdaşlıq prinsiplərinə əsaslanacağına ümid etdiyini açıqlayıb.

Müxbir: Firuzə Həşim