“Pegasus Tech Ventures” tərəfindən təşkil olunan və dünyanın altı qitəsində 200-dən çox regional yarışı birləşdirən “Startup World Cup” beynəlxalq startap yarışmasının Azərbaycan üzrə regional finalı sentyabrın 17-də Bakıda keçiriləcək. Artıq üçüncü dəfə SABAH.angels (SABAH Mələk İnvestorlar Klubu) tərəfindən təşkil olunan regional final Qafqaz, Mərkəzi Asiya, Yaxın Şərq və Türkiyədən olan startapları bir araya gətirəcək.

Regional final sentyabrın 17–18-də SABAH.HUB İnnovasiya Mərkəzinin təşkilatçılığı, dövlət qurumlarının və özəl sektor tərəfdaşlarının dəstəyi ilə keçiriləcək “Baku ID” innovasiya festivalı çərçivəsində baş tutacaq. Festival bu il ilk dəfə innovasiyanın episentri olan “SABAH.city” innovasiya şəhərciyində keçiriləcək.

Presedent.com xəbər verir ki, bu barədə AZƏRTAC-a SABAH.HUB İnnovasiya Mərkəzindən məlumat verilib.

Müraciət mərhələsində artıq 10-dan çox ölkədən 100-dən yuxarı startap qeydiyyatdan keçib. Qiymətləndirmənin nəticələrinə əsasən seçiləcək 10 startap regional finalda öz biznes modellərini, texnoloji həllərini və böyümə potensialını yerli və beynəlxalq ekspertlərdən ibarət jüri heyəti qarşısında təqdim edəcək.

Qiymətləndirmə zamanı həllin real bazar probleminə uyğunluğu, biznes modelinin dayanıqlılığı və layihənin qlobal miqyasda böyümə potensialı əsas meyarlar sırasında olacaq. Bununla yanaşı, iştirakçılar investorlar, sahibkarlar və innovasiya ekosisteminin nümayəndələri ilə birbaşa əlaqələr qurmaq imkanı əldə edəcəklər.

SABAH Mələk İnvestorlar Klubunun direktoru Alya Abbaszadə bildirib: “Məqsədimiz yalnız bir startap seçərək onu San-Fransiskoda keçiriləcək qlobal finala göndərmək deyil. “Startup World Cup” vasitəsilə regionun perspektivli startap təsisçilərini beynəlxalq investorlarla birbaşa əlaqələndirmək və Bakıdan qlobal bazarlara yeni körpülər yaratmaq istəyirik”.

Regional finalın qalibi noyabrın 6-da San-Fransiskoda keçiriləcək “Startup World Cup Grand Finale” yarışmasında iştirak etmək və 1 milyon ABŞ dolları həcmində investisiya mükafatı uğrunda mübarizə aparmaq hüququ qazanacaq.

“Startup World Cup”ın regional finalının “Baku ID” çərçivəsində keçirilməsi beynəlxalq yarışın yaratdığı imkanları festivalın investor və innovasiya şəbəkəsi ilə birləşdirəcək. Bununla da region startapları qlobal bazarlara çıxış, potensial investorlarla əlaqələr qurmaq və layihələrini beynəlxalq səviyyədə təqdim etmək üçün yeni imkanlar əldə edəcəklər.

Startap layihələrinə müraciətlərin qəbulu sentyabrın 10-dək davam edir. Müraciət etmək istəyənlər https://www.startupworldcup.io/azerbaijan-regional-2026, “Baku ID” innovasiya festivalında iştirak üçün qeydiyyatdan keçmək istəyənlər isə https://bakuid.com/tickets ünvanına daxil ola bilərlər.