Gürcüstanın Kvemo-Kartli bölgəsinin Uşu-sanda Federasiyasının rəhbərliyi və federasiyanın tərkibindəki “Marneuli” və “Qaraçöp” klublarının yetirmələri Ulu Öndərin Tbilisidəki abidəsini ziyarət ediblər.
Kvemo Kartli bölgəsinin Uşu-sanda Federasiyasının prezidenti, dəfələrlə SSRİ, Avropa və ikiqat dünya çempionu, Azərbaycanın Əməkdar idman ustası, Əməkdar məşqçi Canpolad Budaqov AZƏRTAC-a müsahibəsində deyib ki, rəhbərlik etdiyi qurumun idmançıları bu yaxınlarda Tbilisidə Uşu-sanda üzrə Gürcüstan çempionatında böyük uğur qazanıblar.
Həmin yarışda 8 yaşdan yuxarı, 4 yaş kateqoriyasında və müxtəlif çəki dərəcələrində 32 azərbaycanlı uşaq, yeniyetmə və gənc iştirak etmişdi və onlardan 27-si medallar qazanıb. Federasiya rəhbərliyi və idmançılar bu qələbəni Ulu Öndərin doğum gününə həsr etmişdilər.
Bu gün idmançılarımız dünyaşöhrətli siyasi xadim, Gürcüstanın və gürcü xalqının da yaxın dostu Heydər Əliyevin abidəsini ziyarət etdilər. Doğma Azərbaycanımızın və Gürcüstandakı soydaşlarımızın daim qayğısını çəkən, onlara dəstək olan Ulu Öndər qarşısında mənəvi borclarını yerinə yetirdilər” – deyə, Budaqov vurğulayıb.