Audit Cozef Bayden administrasiyasında korrupsiya aşkarlayıb. Belə ki, ABŞ-ın 46-cı prezidenti Cozef Baydenin administrasiyasının Ukrayna hərbçilərinin reabilitasiyası üçün nəzərdə tutulduğu iddia edilən oyun konsolları və proqram təminatının saxta alışına 144 milyon dollar xərclədiyi məlum olub. Donald Trampın inauqurasiyasından sonra başlanmış audit göstərib ki, əslində bir dənə də olsun dəst alınmayıb, onlar yalnız kağız üzərində mövcud olub. “USA Today” xəbər verir ki, bundan əlavə, eyni reabilitasiya proqramı çərçivəsində kurslara büdcədən 18 milyon dollar ayrılıb.
“Konstitusiya” Araşdırmalar Fondunun rəhbəri, hüquq müdafiəçisi Əliməmməd Nuriyev mövzunu Presedenttv.com-a şərh edərkən deyib ki, korrupsiya hər zaman dövlət hakimiyyətinin mühüm problemlərindən biri olub.
Ə.Nuriyev xatırladıb ki, Bayden administrasiyasının hakimiyyəti dövründə korrupsiya ilə bağlı müxtəlif ittihamlar zaman-zaman səsləndirilib, o cümlədən onun oğlunun biznes fəaliyyəti ilə bağlı şübhələr olub, ABŞ-ın beynəlxalq yardımların şəffaflığı üzrə dövlətin prinsiplərinə riayət etməməsi geniş müzakirələr yaradıb. Auditin keçirilməsindən sonra ABŞ-ın keçmiş prezidenti Cozef Baydenin administrasiyasına qarşı hazırda irəli sürülən ittihamlar göstərir ki, dövlətin və cəmiyyətin maraqları şəxsi biznes maraqları və siyasi məqsədlər üçün qurban verilib. Cozef Bayden korrupsiya sövdələşmələrində ittiham olunmasının əsas səbəblərindən biri də bundan ibarət olub ki, vaxtilə onun oğlu Hanter Bayden Ukrayna və Çin şirkətləri ilə sövdələşmələrinə girib. Xüsusilə onun enerji şirkətlərindən birində yüksək vəzifə tutması, atasının vitse-prezident olduğu dövrdə siyasi təsirindən istifadə edərək müqavilənin imzalanması qeyd olunmalıdır. Məhz Hanter Baydenin qazandığı vəsaitlər onun atasının siyasi vəzifəsi hesabına artırılıb.