Moskvada güclü qar yağması davam edir və bunun nəticəsində paytaxtda qar örtüyünün hündürlüyü yanvar ayı üçün rekord göstəricilərə çata bilər.
Presedenttv.com xəbər verir ki, “Fobos” Hava Mərkəzindən bildirilib ki, “Frensis” Balkan siklonu səbəbindən Moskva və Moskva vilayətində bir sutka ərzində aylıq yağıntı normasının 65 faizədək hissəsi düşüb. Onun sözlərinə görə, axşama doğru paytaxtda qar yığınlarının hündürlüyü 65 santimetrə çata bilər ki, bu da yanvar ayında müntəzəm meteoroloji müşahidələrin aparıldığı bütün dövr ərzində mütləq rekord olacaq. Əvvəlki maksimum göstərici 57 santimetr təşkil edib.
Sinoptiklər qeyd ediblər ki, güclü yağan qar yalnız yanvarın 9-da saat 21:00-dan sonra zəifləməyə başlayacaq və yanvarın 10-na keçən gecə və səhər saatlarında azalacaq. Paytaxtın nəqliyyat departamentində yol şəraitinin mürəkkəb olması ilə əlaqədar sakinlərə ictimai nəqliyyatdan istifadə etmək tövsiyə olunub.
Güclü siklon Moskva hava limanlarında onlarla aviareysin ləğvinə səbəb olub. Mürəkkəb hava şəraiti bir sıra qonşu regionlarda da müşahidə olunur. Xüsusilə, Kaluqa vilayətində güclü qar yağması səbəbindən ictimai nəqliyyatla daşımalarda ciddi fasilələr yaranıb, ayrı-ayrı yaşayış məntəqələrində elektrik enerjisinin təchizatında da problemlər qeydə alınıb.