Hər 10 britaniyalıdan 6-sı səhiyyə sistemindən narazıdır
Yeni keçirilmiş sorğuya əsasən, Britaniyanın Milli Səhiyyə Xidməti (NHS) ilə bağlı ictimai narazılıq rekord həddə çatıb.
Presedenttv.com “The Independent”ə istinadla xəbər verir ki, “British Social Attitudes” (BSA) adlı genişmiqyaslı araşdırmada iştirak edən hər 10 nəfərdən 6-sı Britaniyanın Milli Səhiyyə Xidməti (NHS) ilə bağlı narazılığını ifadə edib.
Sorğuda iştirak edən 10 min nəfərdən çox İngiltərə, Uels və Şotlandiya sakininin 59 faizi “NHS”in fəaliyyətindən xeyli və ya çox narazı olduqlarını bildirib. Bu nəticə 1983-cü ildən bəri keçirilən sorğular arasında ən yüksək narazılıq səviyyəsi kimi qeydə alınıb. Nəticələr ictimaiyyətin səhiyyə xidmətinə olan etimadında təəccüblü çöküş yaşandığını göstərir.
Sorğuda, həmçinin insanların təxminən 10 faizi son illərdə səhiyyə xidməti nəticəsində zərər gördüklərini qeyd ediblər. Bu cür hallar əsasən xəstəxanalarda qeydə alınıb. 2024-cü ilin payızında keçirilən və “Nuffield Trust” ilə “King’s Fund” tərəfindən yayımlanan hesabatda A&E (təcili yardım), ailə həkimləri (GP) və stomatoloji xidmətlərə məmnunluq səviyyəsində kəskin eniş müşahidə olunub.
